أعلنت الحركه الدوليه لفك الحصار عن غزة عن المشاركه في إعتصام مفتوح لفك الحصار وهذا من 19 يونيو الماضي

علي بوابه معبر رفح "الحدود المصريه الفلسطينيه"...

تنحصر مطالبهم حول رفع الحصار لنجده الشعب الفلسطيني الذي لا يتعرض الا لحرب الإباده في كل يوم

إباده شعب عربي كامل بعد فشل كل الأنظمه في الوصول لحل او هدنه مع العدو الصهيوني

وبعد زيارة اوباما الأخيره الي مصر وعدت الحكومه المصريه بفتح المعبر لمده 3 ايام أخر شهر يونيو

ومن المقرر ان يكون ذلك من 27 إلي 30 يونيو

ومن الجدير بالذكر انه قد اقامت هذه الحركه عده مظاهرات مناهضه لأوباما تطالبه بذلك

علمنا ان اعضاء الحركه من مختلف الجنسيات المصريه والأجنبيه والأمريكية

رافعين لافتات وصور معتقلي أحداث غزة في مصر

أ/مجدي أحمد حسين:حزب العمل الإسلامي

أحمد دومة:حركه غاضبون

يجمعهم هدف واحد وهو التضامن مع شعب غزة بفلسطين

سأذهب لمشاركتهم المده المتبقية من الإعتصام...علي وعد بأن تكون التدوينه القادمه بعد العوده من هذا الحدث

أرجو منكم المشاركه...وإن لم تتمكن فعليك بنشر الخبر حتي يشارك الأخرون

حقيقة أحداث 6 ابريل 2009

واقع الحدث

يوم 1 ابريل
تم القبض علي أمنيه طه أحمد أحمد غازي(كفر الشيخ) 19 سنه

وسارة محمد ابراهيم رزق (طنطا) 19 سنه

من امام جامعه كفر الشيخ في تمام السعه 12 ظهراً وقد سلمهم الحرس الجامعي إلي جهاز أمن الدولة علي يد (هيثم الهياتمي)وكان بحوزة الفتيات عشرة ورقات فقط دعوة للإضراب القادم طوال هذا اليوم أعلن الحرس الجامعي عن تسليم البنات لأمن الدولة ولكن امن الدولة رفض الإعتراف بوجود البنات

يوم 2 ابريل
تم عرض البنتين علي النيابة في مجمع محاكم كفر الشيخ أثناء وجودنا وتمكنا من رؤيتهم والتحدث معهم في حصار أمني مكثف وتقييد لأيدي كل بنت بعسكري يتبعها وأتهموا ظباط أمن الدولة بالإعتداء بالضرب ومنعهم عن الطعام وعن النوم طوال الليل وتم تهديدهم بالإعتداء الجنسي من ظابطي أمن الدوله كفر الشيخ وهم ( محمد عبد الرحمن-عبس اشرف سعيد ) وأضاف المحامين أن من التهم الموجهه للبنات

• الإنضمام لتنظيم سري غير شرعي
• والتعدي علي الثوابت الدستورية
• وتوزيع المنشورات
• واستخدامهم للتعبيرات (حقنا وهناخدة-تحيا مصر)

وعندما علمنا بتأجيل عرض البنات 24 ساعه علي ذمه التحقيق وعودتهم لقسم اول شرطة كفر الشيخ تم عمل مسيرة من مجمع المحاكم حتي قسم الشرطة مطالبين إخلاء سبيل البنات وعند الوصل لقسم الشرطة استمر الإعتصام حتي خرجت قوات الأمن قائلين عددكم قليل فمن السهل احتجازكم جميعاً فورا حتي أعلنوا موافقتهم علي زيارة البنات مرة ثانيه داخل القسم والسماح بدخول لهم الطعام وبعض إحتيجاتهم في مقابل انصراف هذا العدد من التجمهر امام القسم لأنه قد زاد عن 30 فرداً وعشرة محامين وقضي البنات ليلتهم في تخشيبة أحداث وحدهم

يوم 3 ابريل
سمح بزيارة أمهات البنات فقط وذلك من خلف شبابيك حديد فقط وأعترفت أجهزة الأمن ان القرار كان حبسهم 4 ايام علي ذمه التحقيق وان قرار اخلاء السبيل او تجديد الحبس سيتم في صباح اليومن التالي عند انتهاء موعد الأربعة ايام

يوم 4 ابريل
تجديد حبس البنات 15 يوم علي ذمه التحقيق ....مما أدي لحدوث فوضي كبيرة من شباب 6 ابريل وأهالي البنات داخل قاعه المحكمه وقطع أحد شباب الحركة بطاقته الشخصية ليلفي بها في وجه أحد المخبرين فحاول المخبر تجميع أجزاء البطاقة لمعرفة بيانات الشاب فتعدي عليه وضربه عدد من اهالي كفر الشيخ محاولين الدفاع عن الشاب الذي أعلن عن استقلالة عن بلد يملاؤها ظلم الطاغية لا ترحم حتي البنات

وعندما خرج شباب 6 ابريل في الشارع أمام مجمع المحاكم في غضب وثورة من قرار تجديد حبس البنات استمر التصعيد والهتاف ورفع اليفط لمدة لا تزيد عن النصف ساعه حتي جاءت عربات الترحيلات في سرعة ليفاجأ الجميع بأكثر من 50 بلطجي أمن دولة يقومون بالقبض علي كل شباب 6 ابريل وضرب اسر البنتين والقبض علي محمود رزق شقيق سارة مع الشباب والقبض العشوائي علي كل من يقف بالشارع محاولا الاستعلام عن سبب كل هذا الرعب الأمني بمنطقه مجمع المحاكم ووصل عدد المعتقلين في ذلك اليوم لما يزيد عن 35 معتقل ومشتبه فيه بشكل عشوائي ...وجاءت انباء عن استمرار ضرب الشباب داخل عربات الترحيلات في مناطق بعيدة ضرب وحشي
وحدوث كسور وكدمات بالغه لجميع المقبوض عليهم ....وتم تقديم بلاغ للنائب العام عن كل ما يحدث بكفر الشيخ وتم الإفراج ليلاً عن البنات المعتصمات من أجل امنيه وسارة ومحمود رزق شقيق سارة وبعض شباب سته ابريل ما عدا اقل من 10 افراد علاقتهم مؤكدة بالحركة وتهمتهم التحريض وعدد من اهالي كفر الشيخ حيث اٌثبت ان ليس لهم علاقه بالحدث

يوم 5 ابريل
تم الإفراج عن امنيه وسارة في تمام الخامسه عصراً بعد استئناف تجديد الحبس 15 يوماً وعادوا لمنازلهم بعد كتابه والد كل منهما تعهد علي نفسه بعدم خروج ابنته او ظهرورها حتي نهاية الإضراب مما أدي للتواصل الإعلامي مع سارة عبر المداخت التليفونية فقط
وكان ذلك مع معتز الدمرداش (90 دقيقه) ومني الشاذلي (10 مساءً) ورفض اهل أمنيه الظهور أو التعامل مع وسائل الإعلام رفضاً قاطعاً
وتم استدعاء والد سارة بأمن دولة محافظه الغربيه التابعة لهم

يوم 6 ابريل
أنباء عن فشل يوم الغضب في مصر وعدم استجابه الشعب المصري للإضراب كما حدث فالعام الماضي
وأنباء أخري عن استجابه الطلاب الجامعيين للإضراب
وذلك في جامعات عين شمس والإسكندرية واسيوط وطنطا وطلاب معهد تكنولوجيا بنها
وكان بمجلس أمن الدولة تظاهر حزب الغد وحزب الإصلاح والتنمية ونواب مجلس الشعب اخوان ومستقلين إتحاد العمال
وبنقابه الصحفيين حركة كفايه و حركة لا لنكسة الغاز وحركة حقي وشباب 6 ابريل
وحزب الجبهة الديمقراطية وحزب العمل والكرامة والإشتراكيين الثوريين
وأمام دار الحكمة وأطباء بلا حقوق ومهندسون تحت الحراسة
والنوبيون امام مبني ماسبيرو
فقد نجح إضراب العام الماضي في المحله الكبري وبإضراب كل مواطني محافظات مصر المختلفه في منازلهم
ونجح إضراب هذا العام بالقبض علي شباب 6 بريل وقهرهم حتي لا يكونوا احرار في هذا اليوم
ومع ذلك فقد نزلت كل الكيانات من عمال وقيادات مجلس شعب ومهندسين وأطباء وطلاب جامعيين لرفع لافتات كل منهم مطالب بحقة
وجاءت انباء ليلاً عن اخلاء سبيل كل المعتقلين وخرجوا 11 مساءً
حمد الله علي سلامة الرجالة
والإضراب مشروع مشروع ضد الفقر وضد الجوع
وإضرب إضرب إضرب تاني ..... شباب ابريل خرجولكوا تاني

سنة أولي تدوين

بعد مرور ما يزيد عن عام من الكتابات السياسية والجادة والساخرة والمؤثرة علي النحو النفسي

فقد كانت مدونة زعلانة هي ملاذي للتعبير عن سبب تسميتها بهذا الإسم في مختلف مواقف الحياة العامة

عن أرض النفاق كتبت

أرض النفاق

وفي محاولة بسيطة لوصف محطة ِمصر

فى محطة مصر

وبعد ذلك اتجهت كتاباتي للنقد السياسي الساخر

سيناء مرجعتش كامله لينا ولا مصر اليوم فى عيد

مكافحه الفساد تُرحب بكم

إضراب 6 إبريل يوم الغضب المصرى

ارفعوا الدعم عن الفساد

سلاح المقاطعه

ما راأته عيناي فى يوم 6 إبريل

مَهزلة

الحدود المصريه الإسرائيلية

فحاولت الإعتصام والتمرد علي كل ذلك

م الأخر....أنا قررت أعتصم!!!

فبعثت برسالة صغيرة إلي والي وفرعون مصر

رسالة الى الوالى

ومن هنا بدأت الكتابة حسب الظروف المحيطة في كل تدوينة

خاص جداً وليس للإطلاع

انت فين ياصاحبي؟

يارب احنا عايشين لية

وحينما أردت أن أكتب بدافع الخيال والتصور الفعلي

وصيتي قبل ما أموت

صراع وجود

وعودة أخيرة الي النقد السياسي الساخر

أولي ابتدائ:عربي وحساب ودين

أة يا ناري اة ياناري ...أصله مولع ناري

الجلسه الثانيه فقضيه معتقلي المحله

عالمحله منين...ياسمنودي

شاهد عيٌان وليس شاهد عيان

شاهد عيٌان وليس شاهد عيان

أتحدث اليوم عن شاهد عيٌان أي مريض

وليس كما نعرفة شاهد عيان علي الحدث

فالشاهد العيان هو شاهد كان موجود في مكان الحدث وقت وقوعة فيصبح شاهداً لما رآاة فقط

إنما الشاهد العيٌان هو من يذهب مسرعاً لمكان الحادث بعد وقوعة ويدلي بشهادته لكل من يحيط به بالكذب

ليروي ما رآاة بخيالة وليس بأعينة (اللي ان شاء الله هياكلها الدود بمختلف أنواعة)

مثلما حدث في الأيام الماضيه في القاهرة بمنطقة جامع الحسين

أردت منكم فقط الدقة في الإستماع لشهود العيان اللذين تم استضافتهم لمدة لا تتجاوز الدقيقة لكل منهم هناك

• الحادث كان بسيط والحمد لله متقطعش عيشنا والسواح بييجوا والدنيا زي الفل زي ما هي والإصابات خفيفة
• مصر بلد الأمن والأمان مهما حصل مهما حصل مهما حصل
• أنا شفت رجلين بتطير ودراعات بتطير وعيال صغيرة مفزوعة وبتعيط ذنبهم ايه (منافق)
• ايه دا هو بجد حصل انفجار فالحسين... ينهار ابيض....مات كام!! (شباب سيس)
• دي حركة مقصود بيها حرق دم بتوع الشرطة والظباط بس فيبقي دي حركة تهزأهم
• مش عارف بصراحة
• لالالا أكيد اللي بدقوون والمتشددين هما اللي عملوها وهيرجعوا يقرفونا (ملحد)
• سائحين كتير تعاملوا مع الحادث بحيادية معتبرين ان الإرهاب مش في مصر بس فكل حتة مفيش مشكلة
• مانشيتات الجرايد بتحكي عن التراجع المدمر اللي حصل فالسياحة في مصر ورحيل كل الجنسيات الأجنبية
• هما بتوع ستة ابريل اللي عاوزين يولعوا في البلد وخلاص
• اللي حصل دا حرام واحنا مش واخدين علي كدة الشعب المصري ايد واحدة سواء مسلم ولا مسيحي ياراجل دا لو يهودي ميعملش كدة !!! (تفتكروا؟)

عموماً انا شفت الراجل دا فتقرير من تقارير البرامج التليفزيونية وكان نفسي اشتمه بس خسارة فيه اشيل ذنب

• الحكومة هي اللي عملت الليلة دي كلها عشان يروحوا منزلين لنا قانون الإرهاب بقي وبالأمارة الرخام وتوابع الإنفجار هي اللي عملت الإصابات لكن المفرقعات نفسها زي البمب والصواريخ ولااااااا أي حاجه
• البلد دي مينفعس معاها الا كدة...لازم كزا حاجة تحصل عشان نفوق
• ربنا زعلان مننا أوي وكل المصايب دي تحذيرات منه لينا
• هو احنا ناقصين بهدله من الأمن كل يوم يبهدلونا ويبهدلوا محلاتنا تفتيش عشان يحصل انفجارات ويبهدلونا أكتر
• طب تصدق بإيه يا أستاذ الحكومة جاتلنا المحل الصبح وقلبوا المحل تفتيش وبالليل حصل الانفجار شكلهم كانوا شامين خبر باللي هيحصل يا أستاذ (طبقاً لمقولة الحكومة عارفة كل حاجه)

بدون مناقشة لكل ما قيل أردت فقط أوضح لكم مدي صعوبة معرفة خبر سليم في بلد لا تعرف الآمن ولا تدري

الأمان حتي تتمكن من سماع آي خبر كما حدث

عالمحله منين...ياسمنودي

• حد فاكر اعلان شبكه المحمول اللي جابوا فيها كل المطربين يغنوا اغنيه داليدا
• اسكندريه أحسن ناس وقعدوا يقولوا ورانا ايه ورانا ايه
• وفالنص محمود العسيلي كان بيغني معاهم بيقول عالمحله منين ياسمنودي عالمحله منين أرض جدودي
• كنت عاوزة أعمل ملخص لكل الأحداث اللي فاتت بخصوص قضيه المحله ومعتقلي 6 ابريل اللي كتبت عن أول جلساتهم قبل كدة.
• الجديد اللي حصل فالقضيه
• تأجيل فتأجيل فتأجيل لحد جلسه نص ديسمبر لسه
• كل مرة يتحدد فيها ميعاد الناس نروح علي أمل وتتأجل...
• مع العلم ان المشكله دي دخلت في سبع شهور
• يعني الناس تعتبر بتقضي مدة داخل السجن قربوا علي سنه..
• يبقي اللي هياخد براءة أصلاً اتعاقب
• غيروا دايرتين تحقيق من اول مالقضيه بدأت لحد دلوقتي ويارب ميبقوش تلاته
• بعض الجلسات أهاليالمعتقلين كانوا بيروحوا المحكمه لوحدهم بدون قوي سياسيه
• كانوا بينضربوا وبيتهانو اوكأنهم في مركز ضعف
• دا غير التضييق الأمني المستمر علي كل من يحاول الاقتراب من هذة المحكمه أثناء الجلسه
• ومراقبه التليفونات المحموله بغباء
• والمعاكسات المُستمرة خاصهً للناشطات سياسياً
• أخر جلسات كانت ايام 11 و12و13 نوفمبرلتحديد مصير هذا الملف
• ولكن برضه تأجلت ليوم 15 ديسمبر
• وأعلنوا اخلاء سبيل 2 من المعتقلين
• اخلاء سبيل وليس براءة..
• وذلك لظروفهم الخاصه أحدهم معاق ذهنياً والأخر مصاب في ذراعه
• مش عارفه المعاق ذهنياً دا كان عايش ازاي اصلاً معاهم وكيف تم التحقيق معاه
• والتاني المصاب أكيد مكنش فيه رعايه صحيه ولا أى حاجه طبعاً
• دا غير ان اجراءات اخلاء السبيل
• بتتم بصعوبه شديدة حتي الأن
• وفي احتمال ان المعتقلين الاتنين بعد اخلاء السبيل ياخدوا أمر اعتقال
• ربنا يخليلنا قانون الطواريء مش مخلينا عارفين نعيش

يوم الجلسه الثانيه فقضيه معتقلي المحله

كنت كل ما امسك جرنان وللا حاجه
والاقي اخبار عن معتقلي المحله اللي شالوا الليله بتاعة 6 ابريل كلها
أقول لنفسي عاوزين نبقي نروح للناس دي نشوفها ونتابع مع أهاليهم
فإترتبت من عند ربنا كدة
وألاقيلك كل طوائف القوي السياسيه من اصحابنا وحبايبنا
كلهم بيتجمعوا وبيظبطوا ليوم السبت 6 رمضان
أحلي ما في كل اللي كتبته واللي هكتبه
ان أهالي المعتقلين حضروا معانا في المحكمه
والسياسيين اللي كانوا هناك منين بقي
قاهرة واسكندريه وطنطا ودمنهور
يعني ولنفرض ان كل بلد فيها قله قليله بيقفوا ويقولوا لاءاااااا
اتجمع جزء كبيرمنهم امبارح فمكان واحد وأرض واحدة
في محكمه طنطا حيث عقدت ثاني جلسات قضيه معتقلي أحداث 6 ابريل
المهم عشان تبقي فاهم اليوم كان عامل ازاي هناك
روحنا الساعه عشرة ومدخلوناش الجلسه لا قبل ولا بعد ما بدأت
ولا حتي الأهالي دخلوا الجلسه
تمام............تمام
يعني طول اليوم احنا في قاعه المحكمه الصاله الخارجيه نفسها
يعني مفيش اي مكان تاني اتجمعنا فيه
عملنا ايه بقي كلنا وايه اللي حصل !!!
بنسلم علي بعض وواقفين عادي
لاقينالك المحكمه معشأة مخبرين وفعلاً والله العظيم وربنا يشهد علي كلامي
شكلهم واضح اوي وباين جداً
أولاً ملامح وشهم هو ملامح وشوش الأمن المركزي عيال وبهايم
بينفذوا الأوامر وعقلهم واخد اجازة مالتفكير
ثانياُ المفروض انهم لابسين مدني عشان احنا منعرفهمش
وهما ياعيني واخدين عالوقفه بالعرض جمب بعض
فكانوا واقفين بدون ترتيب اوي بس بالعرض برضه
واحنا لسه لا وقفنا ولا احتجينا ولا اااى حاجه
عرفناهم ازاي بقي
البهوات حاطين شرايط صغننه علي صدرهم حمرا كلهم
واحلي حاجه بقي
تبص لدا حاططها واللي جمبه حاططها واللي ورانا مالناحيه التانيه حاططها
واحد واقف يبص عادي مالدور اللي فوق حاططها اما لاقيتني ببص لهدومي ههه
قمه التخلف.... ماهشوف فحياتي تخلف أد اللي شفتوا امبارح منهم
ومن التشديدات الأمنيه السكر اللي كانوا عاملينها فنفسهم
ويسلاااام بقي عالناس اللي تعمل نفسها معديا من جمبك
وتلاقيها وقفت ساعه تسمع احنا بنقول ايه
هما مشدودين وعارفين ان اليوم دا في بوليكا هتنعمل
فعاوزين يعرفوا احنا ولا مين ولا ايه
وكذا مرة الاقيلك ستات موظفين وكبار تعدي من جمبي ساعه ووشها فوشي وانا معرفهاش
فأبصلها طب ايه يعني: تيجي قايله في ايه يا بنات وتمشي
بنبرة انتوا هنا ليه مشي انتي وهي روحي اعملوا الفطار فالبيت
بس انا كنت بضحك وواخده اليوم بروح رياضيه جداً
المهم أول ما لسه بنمسك ورق صغنن كدة مكتوب عليه بس افرجوا عن أهالينا واتكلموا ولا للظلم
باسم شباب سته ابريل وجبهه الشباب الحر وباسم اهالي المعتقلين طبعاً
اول ما بدأنا نفرش بقي ملحقناش لسه نعمل اي فعل
رخموا وعاوزين ياخدوا ولد من وسطينا كان في واحد من الأمن بيشد الورقه من بنت معانا فالولد خدها منه
عاوزين ياخدوة بقي وعاوزين استاذ مجدي حسين (حزب العمل)
يعني هما اللي بدأوا وسخنوا الدنيا
هتافات واعتصامات وقعدنالهم عالأرض في المحكمه وبدأت الجلسه وبرضه لا رضيوا يدخلونا ولا دخلو اهالي العيال المحبوسه
بس كله كوم وهتافات وكلام كل أم محروق قلبها علي ابنها كوم ثاني
في أم ابنها مطلعش بطاقه اثبات شخصيه لسه
وفي أم راحو البيت عندهم الفجر فتشوا البيت وسألوا عالولد ملقوهوش خدوا اختوا فثانويه عامه لحد مالولد يسلم نفسه وفعلاً
وفي أم اكتفت بالبكاء الشديد والصمت قالت عبارة واحدة:هو يعني ابني انا هو اللي حرق البلد وولع فيها وعمل دا كله
وأم كمان كانت بصراحه ست بميت راجل وانا قلتلها كدة
خدت المايك وكان هتافها الوحيد حسبي الله ونعم الوكيل ولا اله الا الله
الست دي كان معاها واحد راجل كبير عمال يزقها ويحاول يبعدها عننا ويكتم بقها وخايف عليها
فأما عرفنا انه جوزها سكتنا وسبناها
لكن رجعتلنا تاني وفضلت معانا لأخر لحظه وبقلب جامد أوي
قعدت جمبها بعد شويه عالأرض واتكلمت معاها وسمعت كل حد من الأهالي واللي جرالهم
عرفت ان الراجل دا اللي كان بيسحبها من وسطنا بالعافيه كان جوزها...وطلقها...جه عشان خايف يتمسك هو...بتهمه انه كان متجوزها
اتجوز واحده تقف فالمحكمه وتحسبن عالريس وتهتف معانا
وتتطالب بالافراج عن المعتقلين اللي ابنها معاهم
شفتوا الجُبن وصل لإيه؟؟؟
كانت بتقول ماهو طلقني
عاوز ايه؟
خايف يتمسك ويقولوا دا كان متجوزها
انا عايزة ابني............
بس انا كنت مبسوطة
مبسوطة اما كنا بنهتف من قلبنا وندب برجلينا بكل قوة وحماس
مبسوطة لما كنا واقفين سياسيين ومحاميين وصحفيين واهالي وكلنا من مدن مختلفه وجينا عشان الناس دي
مبسوطه لما كان معايا اربع خمس ورقات من دول رافعاهم وواقفه بيهم
وجالي ناس معرفهاش طلبوا مني اتنين ووقفوا جمبي وهتفوا معانا
مبسوطة كمان اما تعبنا وقعدنا وفرشنا نفسنا كلنا مربعين عالأرض نغني للشيخ امام والشيخ نجم وحطينا علم مصر قدامنا
فكروني باللي حصل لشباب اسكندريه كانوا قاعدين يغنوا عالبحر كدة وبس
واتاخدوا واتسحلوا واتبهدلو بس الحمد لله خرجوا علطول
فاضل حاجتين بس عاوزة اقوللهم:
كان معانا امبارح حزب الجبهه الديمقراطيه وحزب العمل وحزب الوفد جه والجلسه شغاله وانضم لينا
وحركه شباب سته ابريل وجبهه الشباب الحر ...
وللساعه تلاته العصر والناس هناك وعرفنا ان الظباط اللي هما الشهود
اتلجلجوا وخافوا ومعرفوش يردوا
واستكملوا سماع الشهود يومين كمان النهاردة معرفش حصل ايه
بس برضه الأهالي مدخلتش
وبيقولوا بكرة النطق بالحكم ان شاء الله عالتسعه واربعين معتقل يارب يرجعوا لأهاليهم بألف سلامه
بحق الدموع والقهر اللي انا شفتها فعيونهم امبارح

صراع وجود

بطل الصراع: شخصٌ بلا هويه بقلبُ لا يعرف الخوف

من انت؟؟
اين انت؟؟
ماذا قدمت لمن حولك؟؟
ماذا فعلت لنفسك ومن حولك؟؟
حقيقة انت لا تسوي شيئاً
بلا هويه وبلا كيان وبلا حق
يستحوذ عليك سجن العقل والتفكير
سجن أبدي بقانون لا يعرف الافراج ولا البراءة
ليس لعدم كفايه الأدله وانما لعدم وجود ايه أدله
فعفواً لقانون المغفلين المقيدين داخل عقولهم
ومن أجل كل ذلك قررت الهروب
الهروب من كل شيء
ومن أى شيء
الهروب من الماضي
الهروب من المستقبل المجهول
هل أنت شخصٌ أناني!!
أم انها هواجس حقيقية داخلك؟
أم انها هواجس؟
أم انها بالفعل هواجس حقيقيه؟
لماذا تبقي علي عهد الصمت؟
اصرارٌ شديد علي الصمت
لا أحد يدري سببه
حتي انت لا تعلم
لعدم قدرتك علي الاقتناع أحياناً
أو لرفضك الحديث حتي ولو من أجل دفاعك عن نفسك
يضيق بك عالمك الصغير الأصل
حتي اصبح لا يساع شخص واحد
وهو انت
الكل يعلم انه قد فاض بك كيل الصبر والتسامح
ولكنك لم تعلن عن ما اردته الأن
الحيرة تقتلك
ماذا بك وماذا تريد؟
ما سر سعادتك الشديدة فى أن تعيش وحيداً
بداخلك شيء ما يريد قتلك والقضاء عليك
ولكنك لست متضرراً الأن
ويبقي السؤال
ماذا تريد؟
وماذا ستكون أجلاً أم عاجلاً؟
وإذا جاء موعدك مع القدر
وفقدت ذاتك فأصابك الشلل
شلل الأعضاء وشلل التفكير وشلل اللسان
تحاول ان تقف فتجد نفسك عاجز عن الحراك
تحاول أن تصرخ فلا أحدٌ ينجيك
فتسحف علي ايديك وقدميك
فلا تجد حولك سوي ورقه
كلما تنظر في مكان تجدها امامك
فهي ليست ورقه
وانما شهاده
شهاده وفاة
ولكن بها اسمك انت
لقد انتهي عمرك
لقد انتهي عهدك
عهد اللا شيء
يملؤك صراع اسمه صراع الوجود
صراع بين الحياة والموت
تتمني الموت في عمر تحياه
وتتمني الحياة في لحظه موت
فالحياة عمر والموت لحظه
وتري روحك طائرة محلقه حوليك
تأخذك الي عالمً أخر
فيأتي ملاك الموت ليعلن أنها كانت
يوميات انسان متوفي
عاش ميتاً ومات ميتاً